Новости

27 орғахта – Россия кинозының кӱні. Актёр Виктор Сагалаков Чебоксарыдағы кинофестивальда «Ир кізінің иң чахсы рольы» номинацияда чиңіс тутхан

Пу сыйыхта кӧп кізінің кӱзі

Виталий Канзычаков
Прайзы даа Виктор Сагалаков артист поларға чайалған тіп санапча. Ол хайдағ даа ойында кӧрігҷінің хайиин тартып алча. Сынында чиит кізі ӱгредіг сферазында істенерге пӧгінтір. Театр тоғызына аны илееде чыл «Читігеннің» директоры полған Виталий Канзычаков кире сазыбысхан тирге чарир. Чайаачы ус сағысха кирче:

– Педагогика колледжінде ӱгренчеткенімде, КВН-да ойнирға хынҷаңмын. Анда мині Виталий Николаевич кӧр салған, «Читігензер» хығырған. Пастап киртінмеем. Ікінҷілепчеткенімні сизініп, ол мағаа чал ахчазын тӧлирбін теен. Мағаа андада 17 час полған.

Хакас оолға пір cаңай ӱгренерге паза тоғынарға cидік арах пілдірген, аннаңар 7 ай пазынаң Виктор саназыбысхан. 2012 чылда Виталий Канзычаков чир-суғҷыбысты пазох театрзар хығырған. Ол тусха Сагалаков колледжті тоозыбызарға, армияа пар килерге паза ХГУ-зар ӱгренерге кіріп аларға маңнанған. Артист чоохтапча:

– Сағынчам, «Читігенде» ынағ ӧме істенче, массовкада ойнирға кӱзім чидер. Порастан кӧрим. Пастап нымахтарда ойнаҷаңмын. Ӱс ай пазынаң Виталий Николаевич «Миске тузы» ойынны турғысча, ӧӧн рольларны Каскар Чаптыков паза мин толдырарға кирекпіс. Саңай алаң асхабыс. Каскар Санкт-Петербургтағы театр вузын наа ла тоос килді, минің ӱгредиим чоғыл, опыдым улуғ нимес. Че режиссер ойнирға теен, аның чахиин толдырарға кирек. Кӧрігҷілер ойынны чылығ удурлааннар.

Виталий Николаевич 2017 чылда ах чарыхтаң парыбысхан. Пис чыл аразына аның устаанынаң мин аймах матырларның омаларын чайирға, Россияның сцена искусстволарының институдынзар ӱгренерге кіріп аларға маңнанғам. Театр вузынзар кірерге ол мині кӱстебеен, че Пӱрӱт чирінзер семинарға пар килген соонда позым ӱгренерге кирек тіп оңарғам. Лекцияларны хығырған саблығ артист Василий Лановой. Сцена узы терминнернең тузаланча, мин аны піл полбинчам. Пілерім, тізең, килче. Че ХГУ-да мағаа ікі ле чыл ӱгренерге халған, театр вузында прай тоғысты наадаң пастирға килізер. Матап сағынғам. Пабамнаң іҷем тоғырланмааннар, хабазарбыс тіп сӧc пиргеннер. Максим Султрековнаң хада вузта 2015 – 2020 чылларда заочно ӱгренгебіс. Мағаа сах андох драма артизінің толдыра ставказын пиргеннер. Позыма сыданғам.

«Акиннің кӱмӱс кірезі» фильм
Кинода пастағы хаалағларны Виктор Сагалаков ідӧк Виталий Канзычаковтың устаанынаң иткен. 2016 чылда пістің хазнада Кино чылы чарлалған. Республиканың культура министерствозы «Кирек Хакасияда полча» марығны иртірерге чаратхан. Улуғ нимес ахча чыындызын тӧрт чиңісчі аразында ӱлестірібіcкеннер. Специалисттер иң пӧзік паалағ «Читіген» театрның тоғызына пиргеннер. «Акиннің кӱмӱс кірезі» – хысхаҷах хоос фильм. Аны режиссерлар Антон Литвиненконаң Артас Канзычаков суурғаннар. Сценарий Алексей Сагатаевти. Прай тоғыстарнаң Виталий Николаевич устаан. Кӧні чоохтаза, фильмнің читпестер илееде. Че драмада амғы тустың ағырсымнығ сурығлары турғызылча. Ол чоныбыстың тархынына чарыдылған. Чир-суғҷыбыс таныхтапча:

– Сигіс чыл аразына кӧп ниме ундудыл партыр. Минің матырым чабал хылыхтығ Назар полғанын пілчем. Андада сизінгем, камераны алаахтыр полбассың. Хоза пір танығ. Театрда ойын тооза син матырның омазынаң сыхпинчазың. Сағаа сценада хада тоғынчатхан арғыстарың, толдырылчатхан кӧг, декорациялар полысчалар. Киноның бюджеді улуғ полбаза, сағаа пірдеезі полыспас, аннаңар пірееде матырның омазын «айландырарға» оой нимес.

Наа проекттер
Халғанҷы чылларда Россия регионнарында кино матап суурчалар. Пілдістіг, якуттар прайзын асчалар. Олар хайдағ даа жанрда фильмні чайабызар оңдайлығлар. 2023 чылда Максим паза Евгения Арбугаевтернің «Выход» документальнай тоғызы «Оскар» сыйыхха сығарылған. Пістің республикадаңар чоохтаза, мында 2008 чылдаң «Хакасфильм» киностудия маңнаныстығ тоғынча. 2017 чылда Ағбанда «Ветер перемен» кинокомпания тӧстелген. Аның устағҷызы – Владислав Кафеев. Тоғысчы ӧме режиссер Михаил Мерзликиннең хада кӧп проект чуртасха кирче. Алында Мерзликин РТС телерадиокомпанияда іcтенген.Виктор Сагалаковтың чооғынаң, Юрий Курочканаң Марина Канадакова хакас артисттерні матап суурчалар, че ағаа оларнаң хада тоғынарға киліспеен. Мерзликиннің фильмінде чир-суғҷыбыс 2017 чылда пастағызын на суурынтыр. Ол тустаң режиссер паза актер ынағласчалар. Чайаачы ус чооғын узаратча:

– Михаил орындағы артисттернең тоғынарға хынадыр. 2017 чылда ол «Харах оды» киноны суурған. Мин паза Каскар Чаптыков албан чыыпчатхан иреннерні ойнаабыс. Пістің рольларыбыс улуғ нимес. Мағаа кӧп ниме чапсых пілдірген. «Акиннің кӱмӱс кірезі» фильмде театрдағылар ойнааннар. Олар сині таныпчалар, удур парарға тимделер. «Харах оды» – РТС-тың проекті. Позыңны хайди кӧзідерзің, андағох хайығ полар.
«Ветер перемен» кинокомпанияның иң улуғ тоғызы – «ЧЕкаго» хоос фильм. Ол Хакасияда суурылған. Анда Россияның саблығ артисттері – Юрий Кузнецов, Игорь Жижикин, Иван Кокорин, Данил Стеклов паза пасхазы – араласханнар. Фильмнің режиссеры Николай Рыбников полча. Пістің артисттерні киноға суурынарға хығырғаннарох. Виктор Сагалаковтың таниинаң, кастинг ӱс ай парған. Актерларны рольларға пастап кинокомпанияның кізілері таллааннар, анаң полған на усты режиссер сыныхтаптыр: кадрда хайди кӧрінче, дикциязы хайдағдыр.
Сагалаковнаң Анат Быдышев тонағҷыларның рольларын толдырғаннар. Викторның матырының сола ады Бурый. Чайаачы ус таныхтапча:
– Андағ улуғ проектте араласханыма ӧрінчем. Ол чахсы опыт. Піреезі камера алнында туртухча, пасхазы, чӱрексініп, сӧстерін ундут салча. Тоғыс табырах парча. Сині пірдеезі сахтабас. Аннаңар наа оңдайларда тоғынарға ӱгренчезің. Игорь Витальевич Жижикиннең пір площадкада тоғынарға таңнастығ пілдірген. Мин аны экранда Харрисон Форднаң тудысчатханын кӧргем («Индиана Джонс и Королевство хрустального черепа» фильм, 2008 чыл. – Авт.), амды позым саблығ артистнең хости турчам.

Сериалда суурынғаны
Виктор Сагалаков театрда ӧӧнінде ачых-чарых кӧңніліг матырларның омаларын чайапча. Че кинода ағаа тонағҷыларны, айналарны ойнирға килісче. 2022 чылда кирек алысхан. Ол узын наа амплуада сынап кӧрген. «Красный Яр» сериалда чир-суғҷыбыс хыдат садығҷызы Вэй Синің рольын толдырған. Сериал ол туста Хызылчар крайының губернаторы полған Александр Усстың пастаанынаң суурылтыр. Проект Кимдегі губернияның 200 чылына чарыдылған. 2023 чылда аны НТВ телеканалда кӧзіткеннер. Чир-суғҷыбыс чоохтапча:

– Таллағны дистанционно иртібіскем. Анаң на піліп алғам, пу рольға кастингті ӱс тува, ікі пӱрӱт паза пис якут актер ирттір. Хакастардаң чалғызан на полтырбын. Пастап кем мині кинода суурынарға хығырчатханын чахсы оңар полбаам. Санкт-Петербургтағы «Триикс Медиа» кинокомпания полтыр. Сериалда пис кӱн тоғынғам. Пастап ӱс кӱн Сус поселокта паза Минсуғда суурынғабыс. Анаң ікі кӱнге Санкт-Петербургсар учух пар килгебіс. Сценарий хоостыра анда садығҷылар Кимдегі губернияның губернаторынаң тоғасчалар. Сериалның режиссеры – Михаил Вассербаум. Саблығ артисттердең проектке Эдуард Флёровнаң Константин Крюков хозылғаннар. Флёров Хакасиядағы устарны таныпчаттыр. Ол таныстарына чолабит читірерге сурынған. Пістің республикадаң Денис Энгель паза мин полғабыс. Артисттернің ӧӧн чардығы Хызылчардағы театрларда істенче. Оларның устары пӧзік.

Сизінгенде, Москвадағы паза Санкт-Петербургтағы режиссерлар актерларның ӱгредиине улуғ хайығ салчалар. Олар пілчелер: театр вузын тоосхан кізі тоғысха тимде, аны ӱгредерге кирек чоғыл.

Ӧӧн роль
Пӱӱнгі кӱнде Виктор Сагалаковтың иң танығлығ тоғызы «Хам Арах» кино полча. Пу рольнаң чир-суғҷыбыс 2017 чылдаң чуртапча тирге чарир. Ол чыл Моол чирінде монодраманың ІІІ чоннар аразындағы фестивальы ирткен. Ағаа удур «Читігенде» моноспектакль турғызыбызарға чаратханнар. Режиссерға Баатр Колаевті турғысханнар, ойынға Алексей Сагатаевтің «Аниматор» пьесазы таллалған. Моноспектакль – сидік жанр. Кем ӧӧн рольны толдырар? Режиссерның чарадиинаң аны Виктор Сагалаковха пирібіскеннер. Артист сағысха кирче:

– «Хам Арах» монологтаң пӱткен. Тус асхынах полғаннаңар, Баатр Доржиевичнең иртен-иир тоғынғабыс. Пьеса орыс тілінең пазылған. Ол минің миизіме саңай сиип парған. Тӱрчедең аны хакас тіліне тілбестеп сыххам. Фестивальда ӧӧн сыйыхты – пір муң долларны – Польшадағы ус утып алған. Мин ікінҷі орынға сыххам, чидиимні киречілепчеткен грамота пар.

Пу роль Виктор Сагалаковтың чуртазын алыстырған. 2018 чылда чиит кізіні Хакас драма театрынзар тоғынарға хығырғаннар. «Хам Арах» ойын ол туста театрның ӧӧн режиссеры полған Марас Чебодаевтің кӧңніне кірген. Марас Степанович артистнең аннаң андар проект хоостыра тоғынарға пӧгінтір. Че, театрда алызығлар пол парып, кирек киліспеен.

2022 чылда Сагалаков «Ветер перемен» кинокомпанияның улуғ нимес фильмінде араласхан. Ӱннендірҷең устарға оборудование тоғындырарға полызып, чир-суғҷыбыс «Хам Арах» спектакльның монологын хығыр сыххан. Сах андох продюсерлер фильм суурарға чаратханнар. Анна Гурина киносценарий тимнеен, проектке саблығ артист, алтай чонның оолғы Амаду Мамадаков хозылған. Хысхаҷах фильмнің режиссеры Михаил Мерзликин полча.

Сагалаковтың таниинаң, киноны олар пис кӱн аразына суурыбысханнар. Артист омазынаң сыхпазын тіп, ағаа ӱс кӱн узирға пирбеендірлер. Чир-суғҷыбыс Амаду Мамадаковнаң таныс полтыр. 2015 чылда «Читіген» театр «Ахол» ойынынаң «Алтын Масканың» марығ нимес «Маска плюс» программазында араласханда, чайаачы ӧмее алтай артист полысхан. Виктор Анатольевич чоохтапча:

– Амаду Васильевичнең тоғынарға оой. Артисттің пілізі алғым, дисциплиназы пӧзік. Аннаң кӧп нимее ӱгреніп аларға чарир. Мағаа суурынарға оой полбаан. Чебоксарыдағы чоннар аразындағы кинофестивальда сыйыхха турызарбын тіп пір дее сағынмаам. Синің тоғызыңны пӧзік паалапчатсалар, ӧріністіг. Че олох туста пілінчезің, пу сыйыхта кӧп кізінің кӱзі: Виталий Николаевич Канзычаковтың, арғызым Алексей Сагатаевтің, хада тоғынған режиссерларның, актерларның, «Ветер перемен» кинокомпанияның. Аның устағ-пастааның кӱстенізінең фильмнер аймах фестивальларның программаларына таллағ иртібісчелер. Прайзына улуғ алғыс. Чонда тидірлер: кізі кізінең кӧдірілче. Анзы андағ полтыр. Ізенчем, піреезіне ідӧк хабазарбын.

«Хам Арах» фильм «KONIK Film Festival» чоннар аразындағы кинофестивальның программазынзар таллағ иртібістір. Аны 23 – 28 орғахта Москваның 13 площадказында кӧзідерлер.

Сом Виктор Сагалаковтың архивінең
Автор: Майя Кильчичакова
Сомда: Виктор Сагалаков «Красный Яр» сериалда