Новости

 

Тун ойын. А.М.Топановтың адынаң Хакас драма театры «№13» кӱлкiстiг ойынны республиканың чуртағҷыларына кӧзiт пирдi

 

Театрның ӧӧн режиссёры Тимур Казнов ынағ ӧменең хада чуртағҷыларға хынығ ойын сыйлап пирдi. «№13» спектакль англия драматургы Рэй Кунинің «Он, она, окно, покойник» пьесазынҷа турғызылған.

 

Пастап наа ойын ноға iди адалчатханын пiлерге хынығ пiлдiрген. Театр­ның кiчiг залынзар ирткендӧк, прай оңары­лыстығ пол парған. Кирек Лондондағы пис чылтыстығ аалҷылар туразының 13-ҷi номерiнде парчаттыр. Хызыл стенелiг номерде iкi iзiк пар – номерзер кiрчеткен паза узуҷаң пӧлiксер парчатхан. Iдӧк улуғ шкаф турча. Андар хостаныс чӧрчеткен ипчiнi алай «ӧлiг» кiзiнi сух саларға чарир. Паза балконзар сыхчатхан кӧзенек кiзiнiң хайиин тартча. 

 

Спектакльда премьер-министрнің полысчызы Ричард Уилли ӧӧн матыр полча. Аның омазын Хакасияның саб­лығ артизi Сергей Доможаков матлама чайап­ча. Аның ӧӧн хыйғызы – «Слово мешает делу!» Табығлар мына ла пасталарға чӧр, че дебаттарда аралазар орнына Ричард Уилли аалҷылар туразының 13-ҷi номерiнде оппозицияның хачызы, абахай Джейннең тоғасча. Чиит хыстың рольын артист Анастасия Быдышева килiстiре толдырча. Че оларға, истiг номерде iкӧлең не халып, улуғларның «ойынын» ойнир­ға килiспин парча. Джейн, кӧзеңенi азыбысханда, кӧзенектiң аар рамазына пастыр салған «ӧлiг» кiзiнi кӧр салча. Хыс­тың сиихтааны пу чир нимес! Ричард Уилли дее хорых парча.

 

– Имнег туразынзар паза полициязар сығдырадарға кирек! – хысхырча Джейн.

 

– Чох, чох, Джейн, анаң пiс iкӧлең мында ниме итчебiс тiп сурығлар толдыра сығыс килер. Мин ам парламенттiң чыылиинда поларға кирекпiн нооза, – тысча аны Ричард Уилли.

 

– Сiрер ам ипчiңердеңер, тоғыстағы ӧзiстеңер паза премьер-министрдеңер са­ғынчазар! – тоғырланча чиит хыс.

 

– Я, я, я! Худайымай! Минiң хараам алнында таңдағы газеталарның заголовоктары кӧрiнче – «Премьер-министрнiң полысчызы, проститутка паза ӧлiг кiзi!» – тазылада хатхырыбысча Ричард.

 

Мындағ киректе пiр ле ниме идерге халча – рамада iлiнчеткен кiзiнi чазырыбызарға. Хайдар? Шкафсар! Премьер-министрнiң полысчызы позының хачызы Джордж Пигденге сығдыратча. Аны артист Валентин Ульчугачев хынығ ойнапча. Ол пастығының хығыртиинҷа чапчаң ойлап килче, че кирек пазын табырах оңнап полбинча, ағаа хоза, харах оды уйан. Че андағ даа полза, ағаа «ӧлiг» кiзiнi номердең пiрдеезiне сизiндiрбин сығар парыбызарға чахығ пирiлче.

 

Ойынның полтазы аннаң андар путхалча. Джейннiң кӱннегҷi ирi Ронни, аалҷылар туразынзар килiп, прай ниме­нi оңар-тискер азырча. Аның омазын артист Анат Быдышев чахсы кӧзітче. Пастап ол уғаа чабал кiзi осхас пiлдiрче. Ипчiзiн прай номерлерҷе тiлеп чӧрiп, таппин, кiчiг пала чiли ылғап сыхча.

 

Ойынны кӧрзе, премьер-министрнiң полысчызы Ричард Уиллинiң ипчiзi айас­тығ пiлдiрче. Сағынчазың, ол ибде одырча, апсаа, тiзең, аалҷылар туразында чиит хыстарнаң оралысча. Че пастағы кӧрiс саба полтыр. Памела iдӧк аалҷылар туразында пол парча. Анзы даа ниик сағыстығ ипчi полтыр, ирiнiң хачызына сырбал сыхча. Памеланың оңдай-хы­лиин Хакасияның саблығ артизi Светлана Селигее­ва килiстiре кӧзiтче. 

 

Пу ойында iдӧк нимезi хынығ? «Ӧлiг» кiзiнi шкафсар нинҷе-нинҷе хати сухчалар, анаң нандыра сығарчалар, диванзар алай кинектер колясказынзар одырт салчалар, аннаңох хада, iкi саринаң холтыхтап алып, плесет салчалар. «Тыны чох» кiзiнi театрның чиит артизi Николай Майнагашев матлама ойнапча.

 

«№13» ойында прай артисттер матырларының рольларын пӧзiк синде толдырыбысханнар. Че Сергей Николаевичтi алынҷа таныхтирға кирек. Ол спектакль тооза пiр секунда даа сым одыр­баан. Аның ах кӧгенее тирге, кӧнектең суғ урған на чiли, ӧтiре пойтлап парған. Хайди паза полар за! Аның 13-ҷi номерде прай чуртазы сайбалча нооза!

 

«№13» спектакль соонаң, хайдағ-да чарых ӱлӱкӱнде пол килген чiли, кiзi чӱреене ниик пiлдiрче.