Новости

 

Тун ойын. А.М.Топановтың адынаң Хакас драма театрының артисттерi кӧрiгҷiлернi «Сцена кистiндегi суум-саам» кӱлкiстiг ойыннаң хатхырт салдылар

 

Кӧрiк айының пастағы кӱннерiнде ле Хакас театрның артисттерi республиканың чуртағҷыларын наа хынығ ойыннаң ӧрiндiргеннер. Пiр ай даа иртпедi, че ынағ ӧме кӧрiгҷiлернiң улуғ залына чонны тығырама пазох чыып алған. Амды артисттернең хада хығыртылған режиссёр Иван Орлов тоғынған. Ол Майкл Фрейннiң пьесазынҷа «Сцена кистiндегi суум-саам» хормачы ойынны турғысхан.

 

Полған на кӧрiгҷi артисттернiң сцена кистiндегi чуртазын пiлiп аларға хынча, неке. Чиит режиссёр Иван Орлов ойын пастыра андағ оңдай пирдi. Театр – ол олаңай офистегi тоғыс нимес. Офис­тегi специалистке, иртеннең иирге теере тоғыныбызып, ибзер парып, нымзах диванда ипти чат салып, тоғыстаңар паза­ғы кӱнге теере ундут саларға чарир. Режиссёр паза артисттер, тiзең, сын чуртаста даа, ойында даа театрнаң чуртапчалар.

 

Ӱс чардыхтығ паза iкi антракттығ ойынны «спектакль iстiндегi спектакль» адирға чарир. Анда режиссёр Ллойд Даллас (Хакасияның саблығ артизi Максим Султреков) ойын турғысча. Че оларға чахсы спектакль тимнебiзерге тус читпинче. Ағаа хоза, аның театрында чуртас саңай «хайнапча».

 

«Сцена кистiндегi суум-саам» спектакльда прай ниме путхалыс парча. Пастағы чардыхта кӧрiгҷiлер Ллойд Далластың театры, тун ойын тимнеп, репетиция иртiрчеткенiн кӧрчелер. Аның спектакльында кӧзiдiлче, хайди город тастында улуғ тура садылча. Аны кӧрер­ге хубас чӧрчеткен оолнаң хыс (артисттер Михаил Карачаков паза Анастасия Быдышева) килчелер. Оларны ундутчах экономка (Хакасияның саблығ артизi Алиса Толмачева) удурлапча. Андада иблерiнзер чурт ээлерi (артисттер Андрей Тюкпиеков паза Александра Тахтобина) айланчалар. Оларның албан ӧдiстерi толдыра, аннаңар налоговай инспекторлардаң чазын чӧрчелер.

 

Соонаң пiлдiстiг пол парча, наа ойынны турғысчатхан артисттернiң паза режиссёрның аразындағы хайызығлар улам путхалыстығ полтыр. Театрда режиссёр Ллойд Далластың чӱрее ӱчӱн аның полысчызы (артист Камилла Кокова) паза абахай артист хыс (артист Анастасия Быдышева) «харбасчалар». Кирi Селздонға (Хакасияның чон артизi Юрий Майнагашев) оғырны ойнирға кирек, че ол ачығ суғ амзабызарға хынадыр, аннаңар спектакль алнында аннаң бутылканы пылазарға ла маңнанминчалар. Артист Митхас Абдин сцена тоғысчызын хынығ ойнапча.  

 

– Пьесанаң танысханда, авторның кӧрiзi хоостыра минiң рольымны улуғ частығ артист ойнирға кирек полған. Аннаңар режиссёрзар пастырғам, че ол минi ойнирға чӧптеп алған. Репетиция­лар пасталыбысханда, ӧткiн тимнен сыххабыс. Артисттерге спектакль iстiнде спектакльны ойнирға, анаң кӧзеңе кис­тiндегi чуртасты кӧзiдерге киректелче. Ӱзiнҷi чардыхта матырларыбыс кӧзеңе кис­тiнде полчатхан нименi сценазар прай сығар килчелер. Позымның матырымның омазын толдыразынаң чарыт пирер­ге кӱстенгем.

 

Аалҷы режиссёрнаң тоғынарға истенгем. Иван Орлов – уғаа нымзах чӱректiг кiзi. Артисттернiң cоона салдыртпас пос киректерi пар полза, ол оой позыт турған, сахтап аларбыс тiҷең. Репети­цияларда ол прай ипти-тапти чоохтап пирҷең, прай ниме чахсы полар тiп, кӧң­нiбiстi кӧдiрiбiсчең. Iдӧк Иван Орлов артистке матырын хайди кӧрче, сизiнче, iдӧк ойнирға оңдай пирче. Мағаа андағ режиссёрларнаң тоғынарға маңат пiлдiрче. Iзенчем, Иван Павловичнең хада тоғынарға пазох оңдай полар, – кӧңнiнең ӱлесче Хакасияның саблығ артизi Алиса Толмачева.