Новости

 

 

 

Ӧнетін ӱгредігліг специа­лист поларға сағынчатхан чииттер театрнаң палғалыс­тығ темалар таллап алғаннар нооза. 2022 чылда кӱскӱдең сығара оларға, Хакас драма театры­ның ӧӧн хоос­чызы Влада Чаптыкованың паза декоративно-прикладной искусство паза чонның хоос культуразы кафедразының доценті, культурология кандидады Оксана Киштееваның устаа­нынаң, профессиональнай чӧптер пирілгеннер, ӱгредіг­ліг мастер-класстар, театрҷа экскурсиялар иртірілгеннер. Мындағ оңдайнаң институт тоосханнар темалары хоостыра иң чағын «Хуу инейнің тӧллері», «Сарын. Тайма хорғыс­таңар нымах» спектакльлар ӱзіктерінің сом­нарын істезіглеріне кирген­нер. Салтарында, диплом то­ғыстарын прайзы чал­тырама арачылабысхан. Оларның санында таныхтирға кирек Ма­рия Потылицинаның «Река времени» тоғызын. Студент хыс анда хакас чонның кип-чоох­тарындағы омалар пас­тыра декоративнай панно чайир оңдайлардаңар чарытча. Пӧ­зік паалаға ідӧк Дарья Буц­тың «Этнотемпоральность» адал парған диплом проекті турысхан. Автор анда хакас чонның алыптығ нымахтарында ипчілер омалары аң-хустарға айлан парчатханы хоостыра керамика панноларын тимнеенінеңер істезіг­лерін пирче. Пу ікі хыстың устағҷызы ДПИ паза НХК кафедразының доценті, культурология кандидады Оксана Киштеева полча. Паза пір чапсых тоғыс Кира Бариновани.  Ол аны, «Стихии» адап салып, театр істін чазирына кӧрілген декоративнай панно проектіне чарытхан. Аның ус­тағҷызы – ДПИ паза НХК кафедразының доценті, тархын наукаларының кандидады Наталья Русина.   

 

Таныхтирға кирек, сыных­тағ комиссиязына диплом проекттерінің консультанты Влада Чаптыкова кирілгенӧк. Ол ідӧк чииттернің пӧзік тимненізін таныхтаан.

 

Паза пір танығ. Пӱӱл кӱскӱзін, А.М.Топановтың адынаң Хакас драма театрының теестегі чайаачы сезоны азылза, институтты тоос­хан пу чиит хоосчыларның чайаа­чы тоғыстарының презентациязы иртер. Олар анда  пастағы істезіглерін театрға сыйлап пирерге чарадығ алыбысханнар. 

 

Национальнай театр ӧмезі Н.Ф.Катановтың адынаң Хакас хазна университедінің филология паза искусство институдын тоосхан оол-хыс­тарны паза чайаачы проекттің тӧстегҷілерін прай чӱрее­нең алғыстапча. Мыннаң хада-пірге тоғызыбыс тоозыл­бас тіп сағынчабыс. 

 

Сом Хакас драма театрының сайтынаң